தமிழில் தாம் தூம் படத்தில் நடித்தவர் இந்தி நடிகை கங்கனா ரணவத். இவர், ஆனந்த் ராய் இயக்கும் தனு வெட்ஸ் மனு என்ற படத்தில் நடித்து வருகிறார். இதன் படப்பிடிப்பு ஜலந்தர் அருகில் நடந்தது. புல்லட் மோட்டார் சைக்கிளில் பின்பக்கம் ஒருவரை உட்கார வைத்துக்கொண்டு வேகமாக ஓட்டுவதுபோன்ற காட்சியில் நடித்தார் கங்கனா. திருப்பம் ஒன்றில், மோட்டார் சைக்கிள், சறுக்கி விழுந்தது. இதில் கங்கனாவின் இடதுகால் டயருக்கு அடியில் சிக்கிக்கொண்டது. கம்பி ஒன்றும் அவரது காலை இறுக்கியது. படுகாயம் அடைந்த அவர், வலியால் கதறினார். உடனடியாக அங்கிருந்தவர்கள் ஓடிச் சென்று அவரை மீட்டு, ஜலந்தரில் உள்ள மருத்துவமனைக்கு அழைத்துச் சென்று சேர்த்தனர். காயம் அடைந்த இடத்தில் எக்ஸ்ரே எடுத்து பார்த்தபோது எலும்பு முறிவு ஏற்பட்டது தெரிந்தது. உடனடியாக டாக்டர்கள் சிகிச்சை அளித்தனர். தொடர்ந்து ஒரு வாரம் அவர் ஓய்வில் இருக்க வேண்டும் என்று டாக்டர்கள் தெரிவித்துள்ளனர்.
